Mandato relativo all'istituzione delle Curie Generali due volte l'anno, in cui giudicare i reclami contro giustizieri e secreti, nonché l'operato di tutti gli ufficiali.

1267-02-15

Rex Karolus. Universis Regni nostri fidelibus per Iusticiarios et alios officiales nostros pacis et justicie copia libere ministretur, iidemque Iusticiarii et officiales fideles ipsos opprimere vel gravare contra iusticiam non attemptent. Statuimus ut singulis annis in kalendis maij [et] in festo Omnium Sanctorum, Generalem Curiam, in qua tractetur de hiis que Nobis placuerint et de bono statu Regni, ubicumque fueritis, celebretur. Ad quam utique Curiam omnes ipsius Regni Iusticiarii veniant personaliter, et in presentia nostra conveniant, nisi certa infirmitate vel alia necessitate inevitabili prepediti, ut puta si status provincie talis esset quod ab illa commode recedere non valerent; in quo utique casu, qui venire non poterit mictat pro se notarium, qui eius acta conscribat, et judices suos vel eorum alterum, sic sufficienter instructum ut querelantibus de se et officialibus suis in eadem Curia, absque ulla exceptione recurrendi ad suum dominum vel requirendi eum, possit et sciat plenarie respondere. Sitque omnibus liberum et licitum de Iusticiariis et eorum officialibusquerelam proponere coram Nobis, per vos vel illos quos ad hoc deputavimus summarie de plano et absque judicii strepitu terminandam. Conveniant etiam in Curia ipsa, in propriis personis, omni occasione remota, omnes Secreti, Forestarii qui custodiunt nemora, massariarum aratiarum et siclarum Magistri, et ceteri qui tenentur Camere nostre reddere rationem, de receptis datis et expensis computum posituri, nisi tales infirmitate fuerint vel alia evidenti et inevitabili necessitate detenti, et tunc mictant procuratores sufficienter instructos, qui pro eis computent et Camere satisfaciant, et respondeant conquerentibus, prout est superius circa Iusticiarios ordinatum. Neque liceat cuique Justiciario aliive officiali, aut hiis qui pro eis venerint de Curia ipsa discedere sine nostra vel vices nostras tunc gerentis licentia speciali. Et si discedere forte presumpserint, aut si Iusticiarii aliique officiales premissi ad prefatam Curiam non venerint, vel non miserint prout superius est expressum, habeantur pro convictis de querelis propositis contra eos. Omnes autem illi qui ad ponendam rationem Camere sunt astricti, reddant de omnibus, que obvenerint sintque data et expensa per eos, plenariam rationem, nec ullo modo discedant antequam ponant computum et Camere satisfaciant, vel per Nos licentiati fuerint, aut per illum, cui in Curia ipsa commiserimus vices nostras.

Datum Capue, per R. etc., XV februarii etc., ut supra.